口口聲聲要加強與年輕人溝通　鄭丹瑞專欄：請問局長識上連登嗎？

「依家班大學生開始放暑假，九月底先至開學，真係有排同你玩，我哋個特區政府到底應該點樣接招，都好頭痕！」損友吹水大會上，損友甲說。「我們那位高高在上、尊貴的民政事務局局長，回應了你的問題啦！」好事之徒回答損友甲：「佢話會加強同年輕人的溝通喎！」高高在上的局長如何和年輕人溝通？我好有興趣知道。

「局長話，政府青年事務委員會推動青年委員自薦計劃已經開始，好多都好受歡迎，好似電影呀、郊野公園呀、公共圖書館呀，政府希望透過這些渠道，吸納更多意見，至於其他意見，都會不斷聆聽，聽落是否覺得好偉大呢？」「問下我們個局長，識唔識得上連登、開TG先啦！」

損友乙說：「那裏先至係青年人的論壇呀，依家仲停留在自我感覺良好的網誌，一係就長篇大論，一係就官樣文章，一睇就知道毫無誠意，連我們這些大人都無興趣睇，你想同後生仔溝通？阿茂同你溝通咩！」

「你呢句自我感覺良好最啱聽！」好事之徒說：「呢班高官口口聲聲要同年輕人溝通，其實完全唔知道點樣埋手，所謂溝通、所謂網誌，完全係門面工夫，寫了當做了，而且我好肯定那些網誌內容，唔係他們親身寫的！」

「後生仔唔只需要溝通，更需要受尊重，愈聽得多呢一班局長的廢話，我愈覺得氣憤、悲哀，因為他們既懶得跟後生仔溝通，又唔識得尊重年輕人。」智者說。